လူဟာ.
. .
လျှာတစ်ခုနဲ့
သာဓုသံဖွဲ့၊
ကာရန်နွဲ့တယ်။
လူဟာ.
. .
လျှာတစ်ခုနဲ့
ငါ
ဟုမာန်ဖွဲ့၊ ကာရန်မဲ့တယ်။
တစ်ခါတစ်ခါ
သကာချိုပျား၊
လူ့လျှာဖျားမှာ
သကြားခဲတွေဖြစ်သွားတယ်။
တစ်ခါတစ်ခါ
တမာလိုခါး၊
လူ့လျှာဖျားဟာ
မုသားသည်းခြေဖြစ်သွားတယ်။
လျှာဆိုသည်မှာ
တစ်ခါတစ်ကြိမ်
ပင့်ကူအိမ်လား
တစ်ကြိမ်တစ်ခါ
ရွှေလိပ်ပြာလား။
အသွားနှစ်မြှောင့်
အမှားစောင့်တဲ့လျှာ
ကြောင့်ကြပါဘိတကား
စကားအဖြောင့်
တရားစောင့်တဲ့လျှာ
တောင့်တပါ၏ဘုရား.
. . . ။ ။
မောင်ခိုင်မာ
(ရုပ်ရှင်တေးကဗျာ၊ ၁၉၈၉၊ ဒီဇင်ဘာလ)
No comments:
Post a Comment